Noah le Jesuh Khrih

Noah le Jesuh Khrih

Gen. 7:1,7,16

Cate Tuan Za Kip Thawng

I. Noah nih hin Khrih a hmuhsak.

a. Amah lawng nih Pathian lung a ton.(Gen. 6:8,9    Mt. 3:17 Jn. 8:29

Vawlei minung a sermi hna a  zoh tik ah an lungthin cu thatlonak lawng te in a khat mi le zei tluk in dah an sual ti a hmuh tik ah Pathian nih minung a ser kha a ngeihchih. Buanchukcho in ka tawl dih lai ti hi Pathian tinhmi a si. Cu ti ih vawlei mi vial te lam an tlau lio ah Noah nih cun Pathian lung a ton. Pathian hmai ah mithmai tha a hmuh. Cu ve bantuk in nihin vawlei ah Pathian nih minung a zoh hna tik ah a ka kawl mi an um lo. A ka tihzah mi zong an um lo, a ka thei mi zong an um lo an za pi te in tuu tlau bantuk in an tlau. Anmah duhmi lam cio kha an zulh tiah a ti. Sihmansehlaw cu chan tha lo kar lak ih minung a sualtuk mi lak ah kan Bawipa Jesuh Khrih, Pathian minung ih a hung cang mi lawnglawng nih Pathian lung a ton. Tipil a innak zong ah van innka a hung ih Thiangthlarau cu thuro bantuk in a rung tum ih van in “Hihi ka dawt mi ka fa a si, a cung ah ka lung a tling” tiah Pathian nih a ti nak kan hmuh. Tlangcung ih muisam thlennak zong ah khan Elijah le Moses hna he tiah bia an i ruah nak zawn ah Pathian nih ka dawt mi ka fa a si a nawl ngai uh tiah a ti than nak kan hmuh khawh. Jesuh lawnglawng nih Pa lung a ton. A mah cung lawng ah Pathian a lung a tling.Phun dang in ka chimh ah cun Jesuh Khrih cu kan chanthar Noah tluk khi a si.

b. Pathian duhnak a sin ah phuan/theihter a si.

          Gen. 6:13-22 Jn. 17:4,8

Noah kha a mah chan lio ih Pathian nih vawlei kha buanchukcho in qawl dih a timh tik ah mi zei sin hmanh ah Pathian nih a thil tuah ding mi kha a chimhnak kan hmu lo. A lung a tong mi Noah sin lawng lawng ah Buanchukcho a tlun nak ding kong le luat nak caah Long tuk a herh nak zong kha a theih ter. Midang cu Noah nih Pathian sin in a don mi a chimh hnu lawng ah an theih cio khi a si.

Pathian nih mikip sin ah a biathli, a biathup a chim lo. Noah sin lawng ah a chim. Cu ve bantuk in Biakam thar chan zong ah Pathian nih Biakam hlun chan ih vawlei a qawl ih mivial te a hrawh dih bantuk khan vawlei hi a tawl than lai. Cu kong ih biathli cu a fapa dawtbik mi Jesuh Khrih sin lawnglawng ah a phuan a si. Khrih dah ti lo Pathian lungthlitum le Pathian tinhmi tlamtling ten a thei mi minung um khawh a si lo.

Nihin ah Pathian biathli theih a duh mi nih cun Khrih kha a ngeih hma sa  a hau zeicah tiah Khrih cu pei Pathian fimnak vialte a thuh nak robawm cu a si cu. Cu robawm a hun nak tawh zong cu Jesuh Khrih a mah qhiamqhiam a si. Khrih a ngei mi, a si lo ah Khrih pum chung ih taksa qhen a si mi unau Krifabu nih cun a duh zong ah duh lo zong ah biathli cu a theih hrimhrim awk a si. Zeicah tiah Biathli a thuh nak robawm Khrih ih pum cu pei kan si cu tiah. Cu robawm hun nak tawh a si mi Khrih chung nun ah a ngei tu pei kan si cu.

Paul zong nih a ti kha. Nihin ka chimh mi biathli hi ka saya hna sin in ka cawn mi a si lo. Minung sin in ka hmuh mi zong a si lo. Jesuh Khrih a mah rori nih biaphuan (revelation) a ka pek mi bak a si a ti ko khah. Johan sin zong ah a ra lai mi kong le zungzal ram ih thil a cang hnga ding mi le thil um tu ning ding tiang zong phuan le theih ter dih a si. Ho nih dah a phuan piak. Krifabu lu Khrih a mah nih a theihter ih a phuan piak mi a si. Khrih sin ah, Khrih chung ah, Pathian nih bia thli a thuh. Cucu Khrih chung in phuanpiak le theih ter kan si tu khi a si.

Johan 17:4,8 chung ah cun “Vawlei cungah na sunparnak cu ka langh ter cang; na ka fial mi rian cu ka liim cang...Na ka pek mi bia kha ka chimh hna i annih nih an i cohlan; nangmah sinin a ra mi ka si kha a si taktak tiah an hngalh i nangmah i na ka thlah kha an zumh” tiah a ti. Pathian nih Jesuh Khrih kha biathli a pek, cucu kan sin ah nihin ah a thlarau in chung nun ah a bia hmang in a kan theih ter ih cohlan khawhnak lungthin zong a kan pek. Hallelujah!

c.Luatnak (khamhnak)  Lawng a ser.

          Gen. 6:14 Heb. 11:7; 10:19,20 Rm.5:6,8

          Jn. 14:6

Pathian nih a lung a tong tu Noah cu a sinah biathli a chimh ih a theih ter lawng si lo in, cu a theih ter mi bia bantuk in Pathian nih thil a phak ter tik ih a luat nak ding ca zong ah Lawng a ser ter. Kan Bawipa Jesuh Khrih nih hin, Noah nih buanchukcho a tlun lai nak kong le luat nak ding caah lawng ser a herh nak kong a phuan bantuk te khan, a ralai mi Harnak nganpi (kum 7 har nak ti tawn mi) kong le vawlei ih cu hrawnghrang ih thil a cang hnga ding tiang in a phuan dih ve. Cu Jesuh phuan mi hna cu Baibal chung ah hmuhkhawh an si.

Cu a ra lai mi harnak nganpi hmang in Pathian nih vawlei a qawlnak ding kong a phuan tiang lawng si lo in cuchung in a mi hna kan luat khawh nak ding ca zong ah luatnak lawng (khamhnak) kha Pathian nih a mah rori a ser ter ve. Noah amah rori nih lawng a ser, Jesuh a mah rori nih khamhnak lawng a ser. Noah nih a ser mi lawng chung ih a lut mi paoh cu cu phun, kha phun ti a um lo, saram minung thlei dan nak um lo in Pathian nih Luatnak a pek dih hna. Cu ve bantuk in zei phun na si a bia pi lo, na dir hmun, na rum maw na si fak maw a bia pi lo. Jesuh ser mi lawng chung na phak phawt ah cun cu harnak chung cun na luat lai. Nangmah lei thil um ah si lo in, a lawng tu ah khan luatnak le himnak cu a um a si.

d. Pathian fial mi vial te a tuah dih.

          Gen. 6:22 Jn. 17:4; 19:30

Baibal ca nih Noah nih cun Pathian fial mi vialte a fial ning in a tuah dih tiah a ti. Kan Bawipa Jesuh Khrih zong Pa nih a thlahhnawh chan nak a si mi tuah awk a si mi vial te kha a lim cikcek ve. Rian na ka fial mi, na ka thlah hnawh chan nak cu ka tlin ter cang tiah a ti. Vailamtah cung in “A lim cang” tiah a ti.

Pathian nih a duhmi le tuah awk ah a fian mi hi mikip nih an tuah kho lo ti fiang tuk in a theih caah a duh nak tlin ter awk ah cun mi vial te a phut loh Bawipa Jesuh Khrih tu khi a duh nak tlamtlin ter awk ah minung ah can ter in vawlei ah a hun thlah a si. Nihin zumtu nunnak zong ah Khrih kan ngeih hmasat lo ah cun Pathian duhnak kan tlamtlin ter kho lo. Nan chung ah ka thlarau ka khumh lai ih ka phungbia ning in kan nun ter hna lai tiah a ti kha. Khrih hi pei kan nun cu a si cu. Kan nu paw chung in kan chuahpi mi hi nun hi Pathian duhnak tlinternak caah a ngah lo. Khrih lawng hi kan nun a si.

II. Noah Lawng, Himnak,Luatnak Lawng.

          Gen. 7:1,7,16

Noah nih luatnak caah lawng pakhat ser. Cu nih a lak ter mi cu Pathian thinhunnak harnak ngan pi chung in kan him khawh nak ding ah cun Jesuh Khrih nih lawng a si mi Krifabu a ser ti hi a si. Lawng nih a hmuh sak mi cu Krifabu a si.

Noah chan lio zong ah lawng dangdang hi rak um dawh a si ko. Noah sermi lawng nak ih dawh le tha deuh zong tampi an hei um phum ko hnga. Zei  a va si hmanh ah minung nih an duh ning le tha an ti ning in sermi lawng nih cun Pathian thinhunnak chung in luatnak mi a pe kho lai lo ti kha philh hlah uh sih. Noah hmanh nih a mah duh ning in hei ser ve sehlaw himnak a hmu hlei lai lo. Luatnak pe tu lawng cu Pathian nih a sak ding ning, a tung a vang, hman awk thing phun, vial te kha a chimh dih a si. Pathian duh ning te ih sermi lawng chung lawng ah himnak tak a um.

a.Lawng pakhat lawng ser a si.

          -Khrih pekchanh mi raithawinak lawng Pathian nih a cohlan mi a si. IPet. 3:18 Heb. 10:12

          -Thawngtha pakhat lawng a um. Thawngqha dang a chim mi cu hell ah an tla lai. IKor. 15:1-4 Gal. 1:8

          -Lam pa khat lawng a um. Jesuh Lawng lam a si. Jn. 14:6

          -Jesuh min pakhat lawnglawng hi kan mah khamhnak caah pek mi min a si. Lam. 4:12

          -Krifabu pakhat lawng a um. A hram Jesuh a si. Pa phun lo mi cu phawi an si dih lai. IKor.3 Mt.15:13. Anungmi Pathian krifabu lawnglawng hi luat nak pe tu ding ah Jesuh a mah nih a sermi lawng umchun cu a si. Bu dang vial te cu minung derhmi lawng te an si. An derh kum le a derh tu zong tuanbia ah a um dih ko.Krifabu tu cu Khrih nih derh mi a si ve.

b. Innka te pakhat lawng. Gen. 6:16

Pathian nih lawng aser ter tik ah a cung lei ah khuazoh nak ding innkate pakhat lawng a ser ter. Lawng chung a um mi nih pawngkam zoh khawh a si lo cunglei lawng zoh ding ti nak a si. Krifabu unau nih vawlei pawngkam zoh lo in vanlei zoh in nun ding.

c. Innka pakhat lawng. Gen. 5:16 John. 10:9

Noah lawng chung ah duhnak paoh in kal ih luh a ngah lo. Innka pakhat lawng ser a si. Jesuh hi innka taktak cu a si a mah sin in dah ti lo miphun, bu, fellowship le thil dangdang nih himnak lawng chung taktak ah mi a phak pi kho lo.

d. A duhmi paoh luhkhawh a si lo. Gen 6, 7

Baibal chung bia kan zoh tik ah Noah sermi lawng chung ah hin a duh mi paoh luh khawh a si lo nak le Pathian nih a luh ter cang mi cu an duh ah duh lo ah si lo in Pathian thimnak tu ah a si nak kong kan hmuh khawh. Hlan kan sak tawn mi ah cun “lut uh a duh mi vial te lut uh” ti a si. Si hman sehlaw Saram hna vial te kha Pathian nih a luh ter lo teh. A khuah a khuah in a ti mi zat lawnglawng luh ter an si kha. Cu saram hna cu an duh ah duh lo ah si lo in Pathian program ning tu khan a kal deuh.

Nihin ah krifabu a tak chung phak ding cu zumtu vial te nih an duh cio ko. Cu caah cun pei an bu min zong ah a donghnak lei te ah “Krifabu” ti biafang cu an tenh lengmang ve cu. Krifabu nan si lo ti law an duh lai lo. Krifabu si an duh dih cio. Baptist krifabu, Methodist krifabu, AG krifabu, UPC krifabu ti bantuk in ti a si kha. Si hman seh law krifabu cu tampi Bawipa nih a derh lo. Pakhat lawng a si. A hram lung cu Khrih a si. Khrih cung ah pehzulh in sak mi lawng khi a dik mi a si kho.

e. Pathian nih a khar te lai.

Noah innchung khar le saram vialte an luh dih tik ah Bawipa nih inn ka a khar piak. Pathian hun mi ho hmanh nih an khar kho lo, Pathian khar cang mi ho hmanh nih hawn khawh a si lo. Amen.